Jólaboð hjá tengdó er nótnabók með nótum af samnefndri plötu úr smiðju Leifs Gunnarssonar. Verkin í bókinni eru Jólaboð hjá tengdó, Stúfur, Flökkulíf í des, Í náttfötum á jóladag, Mjúkir pakkar, Hvít jól, Húsasmiðssöngurinn um jólin og Að kvöldi 11.desember. Lögin eru öll eftir Leif fyrir utan eitt en það semur Ingrid Örk Kjartansdóttir og Leifur útsetti. Kveikjan að plötunni er í mjög stuttu máli sú að Leifur á afmæli í desember og hefur alltaf þótt það algjört vesen. Það að semja, útsetja og taka upp heila plötu af nýrri jólatónlist er hans persónulega úrvinnsla á þeirri gömlu gremju. Vonandi njótið þið afrakstursins. Lögin eru sett fram í lead sheet stíl. Í þeim tilfellum þar sem útsetningar gefa tilefni til eru þær hafðar með en einnig eru lögin sett fram í söngbókarformi. Þar kemur textinn fyrir með hljómatáknum. Leifur Gunnarsson kontrabassaleikari og tónhöfundur er fæddur 1985 og byrjaði ungur að læra á hljóðfæri, lærði á gítar og rafbassa áður en hann sneri sér að kontrabassanum rétt fyrir tvítugt. Hann útskrifaðist frá Tónlistarskóla FÍH 2006 og Rytmisk musik konservatorium, Kaupmannahöfn 2013.