Harmonikuútsetningar Karls Jónatanssonar voru gefnar út árið 1997 og eru enn fáanlegar í takmörkuðu upplagi á íslensku og ensku. Heftið er tilvalið fyrir einstaklinga og hópa s.s. harmonikuhljómsveitir eða félög eða til kennslu. Tölvuuppsetningu á nótunum annaðist Þorgeir Ólafsson. Heftið er afar vandað, prentað í stærðinni A4 með þægilegum gormi sem tryggir að bókin lokast ekki á miðjum tónleikum. Karl Jónatansson er einn þekktasti harmonikuleikari Íslands. Hann fæddist í Blikalóni á Melrakkasléttu árið 1924 og lést árið 2016. Karl var lengt af með eigin hljómsveitir og starfaði samhliða því við harmonikukennslu. Hann var afkastamikill lagasmiður og var landsþekktur fyrir útsetningar sínar en Karl útsetti jafnt fyrir nemendur sína sem og harmonikuhljómsveitir frá dúettum upp í útsetningar fyrir heilu harmonikufélögin s.s. Harmonikufélag Reykjavíkur sem samanstóð þegar mest var af um 50 harmonikuleikurum sem langflestir voru einmitt nemendur Karls.