ÞYRL - Trommur, Ísland

Þyrl trommur hafa verið í bígerð undanfarin 2 ár. Eftir langa meðgöngu er fólst í upplýsingaöflun, rannsóknarvinnu, hundruð tölvupóstskeyta við ýmsa aðila í trommuframleiðslu víða um heim og sérfróða menn er hafa í gegnum tíðina komið að framleiðslu hágæða slagverkshljóðfæra hjá þekktum framleiðendum, þá litu nú fyrstu Þyrl trommurnar dagsins ljós.

Í fyrstu bjóðum við upp á sneriltrommur úr látúni (brass) og bronsi. Þessar trommur eru úr 1,150 mm þykkum málmi í stað 1,3 - 1,5 mm þykktar sem tíðkast hjá mörgum stórum trommuframleiðendum. Ástæðan að þykkt þessi varð fyrir valinu er sú að hún hefur meiri syngjanda, dýpri og eilítið mýkri tón og þarf af leiðandi breiðara tónsvið. Brons hefur dekkri tón en látúnið sem er aftur líflegra og bjartara. Einnig eru gormasætin (snare beds) sérstaklega víð svo mögulegt sé að nota allar týpur og stærðir gorma, allt frá 12 strengja til 42 strengja. Skeljarnar eru framleiddar erlendis sem og allar festingar, og þær fluttar hingað til lands. Sumar skeljar eru síðan handhamraðar, aðrar ekki, tromman síðan samsett, yfirfarin og "voila!" allt er klárt. Einungis þær trommur fara á markað sem eru óaðfinnanlegar í gæðum.

Margir möguleikar eru á að sérhann Þyrl trommur. Hægt er að fá trommurnar með 4 mismunandi gjörðum, þ.e. þríbeygðar (triple flange), einbeygðar með krækjum (single flange w/clips), steyptar (die-cast) og viðargjörðum. Einnig er hægt að óska eftir að óhömruð skel verði hömruð, (hálfhömruð, fullhömruð, mikið hömruð) og verið er að vinna að því að bjóða uppá mynd og leturgröft á trommurnar. Einnig eru tvenns konar gormaskiptar (snare strainers) í boði; Dunnett snúnings skiptir og "kveikjarinn" svokallaði. Fleiri möguleikar á löggum (lugs) og gormaskiptum verða einnig í boði í nánustu framtíð.

Einnig er verið að vinna að framleiðslu á Titanium sneriltrommu, nokkurs konar frumgerð sem verður algerlega smíðuð hér á Íslandi en Títaníum hefur ákaflega skemmtilega eiginleika, hljómar líkt og tré fremur en málmur. Sneriltrommur úr áli og Hlyn (maple) verða einnig fljótlega í boði. Þess ber að geta að viðarskeljarnar verða frá Keller wood products, þeim sömu og framleiða skeljar fyrir m.a. Gretsch, GMS, Noble & Cooley o.fl. Einnig eru í þróun viðarsneriltrommur úr fleiri viðartegundum, Budinga, afrísk mahóný o.fl. sem koma á, á markað síðar og unnið er að hönnun trommusetta sem vonandi verða tilbúin á næsta ári.

Að sjálfsögðu er svo hægt að koma með sérstakar óskir um efnivið í trommurnar eða hreinlega hvað sem er.

Stærðir sem verða fyrst í boði:
6,5 x 14" látún (hamrað eða óhamrað)
6,5 x 14" brons (hamrað)
5 x 14" látún (hamrað eða óhamrað)
5 x 14" brons (hamrað)
7 x 13" látún (hamrað eða óhamrað)


til baka | upp