PORK PIE - PERCUSSION



Pork Pie var eitt af fyrstu “custom” trommuframleiðendunum, stofnað árið 1987 af Bill Detamore.

Í fyrstu framleiddi hann einungis snerla og var fljótlega farinn að búa þá til í ýmsum útfærslum, s.s. solid ply, stave, og úr mörgum málmblöndum. Hann færði sig seinna út í framleiðslu á trommusettum og býður nú upp á standa og trommustóla til viðbótar við trommusettin og sneriltrommurnar.
Það sem hefur verið einkenni Pork Pie er að bjóða upp á óendanlegt litaval fyrir trommurnar. Hvort það er litur sem sást síðast á krumpuðu tyggjóbréfi frá 1950 sem fannst upp á hálofti eða á fallega sportbílnum sem var við hliðina á þér á rauðu ljósi við Kringluna þá geturðu fengið hann, eða kannski viltu fölbleika trommu með festingum í mismunandi bláum lit. Ef þú getur ímyndað þér litinn geturðu fengið hann á trommuna þína.

Pork Pie notar hágæða trommuskeljar úr hlyn frá viðurkenndum framleiðanda í trommurnar sínar en allar festingar eru sérsmíðaðar fyrir þá úr gegnheilu messing.
Mikil natni er lögð í vinnu á brúnum þar sem trommuskinnið liggur á skelinni og er fyrirtækið mjög stórt þegar kemur að lagfæringum á gömlum skeljum. Óteljandi stór nöfn á mála hjá stærri trommufyrirtækjum láta Pork Pie laga til brúnirnar á sínum trommum, t.d. áður en herjað er á hjóðver til að fremja músíkölsk stórvirki. Pork Pie býður líka uppá trommur úr akrýl í mörgum blæbrigðum fyrir þá sem eru að leita eftir þessi sérstaka sem sker þá frá fjöldanum.


Skoða vef Pork Pie

til baka | upp