GPI - Gauger Percussion Incorporated



Gauger Percussion er lítið fyrirtæki sem sérhæfir sig í framleiðslu á aukahlutum fyrir trommur, sér í lagi svokallaðar RIMS festingar.

Stofnandi fyrirtækisins, Gary Gauger, er reyndur trommari og hefur spilað með ýmsum stór nöfnum í gegnum tíðina. Á miðjum sjöunda áratug síðustu aldar hóf hann störf í hljóðveri í Toronto, Kanada, og þar kviknaði áhugi hans fyrir alvöru á að ná sem mestum og bestum hljóm úr hverri trommu. Allt frá því hann fékk sitt fyrsta trommusett hafði hann tekið eftir ákveðnum breytingum á hljóminum í trommunni eftir því hvernig hún var fest upp, tónninn virtist styttri og dauðari ef tromman hékk á sjálfri sér frekar en ef hún fékk að “fljóta” á festingunni.



Árið 1980 kynnti hann fyrstu útgáfa af RIMS-festingunum en fékk ekki mikinn hljómgrunn meðal fólks í trommubransanum. Hann hélt samt ótrauður áfram við að troða þeim inní öll hljóðver og á allar trommur sem hann komst í tæri við og rúmlega áratug eftir að hann hafði fyrst kynnt vöruna tóku stórfyrirtækin að kveikja á perunni. Uppfrá því hafa RIMS-gjarðirnar verið nánast staðalbúnaður á trommusettum í hljóðverum og tónleikasviðum. Óhætt er að segja að hver einn og einasti trommuframleiðandi hafi hannað sínar eigin útgáfur af þessum festingum, eða hermt eftir þeim meira en góðu hófi gegnir enda hefur þessi tegund festinga fyrir löngu sannað ágæti sitt og yfirburði gagnkvart festingum sem skrúfast beint á trommuna.



Gauger framleiðir sýna útgáfu núna úr áli sem gerir hana ríflega helmingi léttari en sambærilegar festingar úr stáli, auk þess sem ál hefur ýmsa hljóðræna eiginleika umfram stál. Gauger eru líka þeir einu sem útbúa gjarðirnar sínar með færanlegum eyrum þannig að þær passa örugglega á hvaða trommu sem er. Staðlaðir litir á Gauger RIMS eru svartur eða burstað ál en hægt er að fá hvaða lit sem er gegn vægu aukagjaldi. Fáanlegar stærðir eru frá 6” – 16” fyrir tom-tom og 12” – 18” fyrir floortom á löppum. Með Gauger RIMS er hægt að fá tærari og meira lifandi tón úr hvaða trommu sem er.

Skoða vef Gauger Percussion

til baka | upp